Wednesday, February 08, 2006

مصر هتكسب علشان هي مصر

من خلال متابعتي لبطولة كاس الأمم الافريقية الحالية لاحظت شيء استفزني للغاية وهو بعيدا عن عشق المصريين جميعا للساحرة المستديرة وشغفهم بها الا اننا جميعا عندنا حالة عدم ثقة في انفسنا لدرجة أصبحت كارثة فنحن أصبحنا نشك في قدرتنا علي اي تحقيق اي انجاز فمنذ قبل بدء البطولة كنا متشككين جميعا في تخطينا الدور الاول وبعد الفوز والتعادل علي ليبيا والمغرب كان الكلام عن شبه معجزة ان نفوز علي كوت ديفوار وحتي بعد فوزنا أصبحت مواجهة الكونغو رعب يا نهار أسود الكونغو دول لسه بتوع أول امبارح (علي اعتبار ان زائير اللي كانت مسببة لنا عقدة وطلعتنا في 74 اختفت واتغير اسمها وبقت الكونغو الديموقراطيةودي لسه معملتلناش عقدة بالاسم الجديد) وبعدين السنغال في دور الأربعة رغم تأهلها بالعافية الا انها سببت لنا ذعرا غير عادي والآن بعد وصولنا للنهائي الكلام عاد لصعوبة مواجهة كوت ديفوار رغم اننا من أسبوع لسه غالبينهم تلاتة بس تقول لمين ازمة الثقة بالنفس مالهاش حل
الغريب ان الناس فعلا فرحانة وسعيدة بهذه الانتصارات بس كل ما تكلم واحد يقولك دول ماعمالوش حاجة ده من عند ربنا علشان الناس الغلابة ما تزعلش يا عمنا ونعم بالله بس ربنا برضه ما بيوقفش غير مع المجتهدين واللي عندهم رغبة في عمل شيء بدليل انه قال اسعي يا عبد وانا اسعي معاك وليه عمرنا ما قولنا ان ربنا كافئنا علشان احنا مجتهدين الغريب ان النغمة دي مش جديدة أنا عشت الكلام ده في كاس الأمم 86 ونفس النغمة والرعب من الكاميرون في النهائي وفي 98 نفس الكلام اننا اخدنا البطولة حظ وربنا وقف معانا علشان الناس الغلابة يا اخواننا ربنا لو كان بيقف مع الكسالي والمستنطعين و الاتكاليين والساكتين عن الحق والراضين بالظلم والفساد وعيشة الذل كان زمان كل المصريين راكبين مرسيدس وعايشين في نعيم بس لأ ربنا مع المجتهدين بس اللي بيقدروا النعم اللي أنعم سبحانه بها عليهم حتي لو كانوا من غير المسلمين بدليل تفوق الغرب و أمريكا بل والصين الذين لا ديانة لهم لكنهم وان لم يهتدوا لدين الله الحق لكنهم صانوا نعم الله عليهم ووظفوها لخدمتهم وخدمة البشرية فكافئهم الله عز وجل وطبعا مش لازم نقول مصير من جحد بتلك النعم ولم يحسن استغلالها لأننا كلنا عارفين وشايفيين كلنا عندنا مرايات في البيت
ثقافة الانهزام وعدم الثقة في تحقيق شيء استطاع أعداؤنا ان يبثوها فينا وساعدنا نحن علي ترسيخ هذه الثقافة في وجداننا ده حتي القيادة السياسية صرحت علي مدي فترات مختلفة اننا والله مش قد الدخول في حروب خلاص واننا لم نعد تستطيع تحمل أية معارك يعني اللي نفسه يعمل حاجة يعملها فينا واحنا مش حنرد عليه بس يمكن ندعي عليه وكويس انهم سابولنا الدعا بدليل دعاء خطباء المساجد كل جمعة اللهم شتت شملهم
المهم احنا انشاء الله حنكسب بس مش علشان ربنا حيسترها مع الغلابة طبعا توفيق الله سبحانه وتعالي أول أسباب النصر بس كمان علشان احنا مصر ومصر دي حاجة كبيرة قوي التاريخ بيقول مصر لازم تكسب والمنطق بيقول مصر لازم تكسب مش علشان احنا الأفضل احنا عندنا عيوب فنية كتير لا ننكر لكن كمان عندنا عوامل كتيرة وقوية ومهمة جدا للفوز الأرض والجمهور اللي يحرك الحجر واللاعبين الذين يلعبون بروح قتالية فعلا فوطنيتهم وحبهم لبلدهم غير عادي وعلشان كده احنا حنكسب بكرة انشاء الله قولوا يا رب......فهل تستجيب يا الهي لدعاء المجتهدين؟

7 comments:

Mr-Biboooo said...

من بقك لباب السما

و على فكرة معاك حق فعلا فى المنتخب بحس ان فيه ناس بتقطع نفسها زى احمد حسن و الحضرة مثلا بحصهم بيموتوا مع كل هجمة و حركة و بيلعبوا كأنهم بيقاتلوا لكن برضه فيه بشوااااااااات

المهم يا ريت البوست الجاى يكون يوم الجمعة بعد الماتش و نكون كسبانين

adhm said...

شوف انا ليا راى فى حكاية الفوز دى مقصودة ومترتبةوكان لازم دة يحصل باى طريقة(شايف ضربة الجزاء اللى ما اتحسبتش)بس مش مهم احنا اتعمل فينا كتير من دة زمان من نفسنا شوية نعمل زى ما اتعمل فينا
حد فاهم حاجة
المهم احنا كان لازم نفوز علشان الناس تغطس فى الفرحة الغامرة والكاسحة وماتبطلش كلام على النصر العظيم والفوز الميمون وهات يا تحليل للمباراة الفظيعة والمجهودات الجبارة وكمان جات حكاية الواد الصايع والمدرب الشرس على شاشة التليفزيون تزود الحبكة الدرامية
يا جماعة مطلوب الناس تنسى الكارثة اللى حصلت
الف بنى ادم كلهم السمك بالليل لا واية مش عافين مين صاحب الشركة
واللةالعظيم لو ماكناش فزنا بالماتش دة كانوا مسكوا قضية دعارة وجابوا كام واحد من الفنانين ولبسوة التهمة المهم اى حاجة الناس تتكلم فيها بعيد عن المصيبةاللى حصلت
الف بنى ادم كلهم السمك بالليل

shortcut said...

يعني مفيش رد فعل من غير فعل
و الففففففففففففففف مبروك لمصر النهاردة اخدنا الكااااااااااااااااااااااااس

Anonymous said...

ana bas 3awza 2a2ool en elly shoftoo emare7 kan she2 ra2e3 gedan gedan we mosh 3arfa awsefoh ezzay

ruby said...

مبروووووووووووووكككككككككككككككككك
لمصر وعقبال كاس العالم
فى المشمش ان شاء اللة

change destiny said...

ألف مبروك . أدينا كسبنا

Anonymous said...

طبعا مبروووك والف مبرووك كمان لمصر

عقبال كاس العالم

مش صعبه