Friday, December 22, 2006

شكرا يا أهلي علي الدرس لكن هل نستوعب

الأهلي البطل العظيم استحق ثالث عالم عن جدارة والمولد انفض لكن يبقي الدرس كيف استطاع فريق في تلك البقعة التي تمتليء للاسف بكل ما هو مؤسف ومحزن ان يحقق انجاز حقيقي الاجابة تختصر في كلمة واحدة
ادارة
ما فعله الاهلي هو مفتاح النجاح في اي مجال هو ما جعل الولايات المتحدة تفعل ما تفعله بمقدرات هذا العالم هو جعل فودافون وموبينيل تلتهم فلوس الغلابة
الادارة الكلمة السحرية
تخيلوا لو مصر تدار كما يدار الاهلي ساعتها يمكن نبقي تالت عالم مش عالم تالت
تفتكروا ان احنا لازم يكون عندنا مدرب اجنبي زي الاهلي مش مهم ايه المانع ما احنا طول عمرنا عندنا خبرا اجانب في كل حاجة المهم الادارة الصح عارفين الادارة الصح جت ازاي
جت من انتخابات حرة نزيهة للجمعية العمومية للنادي الاهلي
ناس عندها وعي وللاسف دي المشكلة الوحيدة اللي بتواجهنا راحوا لصناديق الانتخاب اللي هي زجاجية لاحظوا ان الاهلي اول مكان عمل الصناديق الزجاجية في مصرشفافية يا هووووه وانتخبوا مجلس ادارة محترم لا مصالح شخصية ولا اهواء الكل هدفه الصالح العام وخدمة ناديه
يا تري امتي حييجي يوم وتدار مصر بادارة واعية محترفة نزيهة مثل الاهلي
بس للاسف هي بتدار بطريقة مجلس ادارة الزمالك مع خالص اعتذاري للزمالكاوية
علي رأي عمنا بيرم التونسي
يا شرق فيك جو منور
والفكر ضلام
وفيك حراره يا خساره
وبرود اجسام
فيك تسعميت مليون زلمه
لكن اغنام
لا بالمسيح عرفوا مقامهم
ولا بالاسلام
هي الشموس بتخلي الروس
كدا هو بدنجان