بكرة أكيد أحلي

المتأمل لما يجري في مصر حاليا ربما يجد نفسه في حيرة بين ان يكون متفائلا بمستقبل افضل وبين نظرة متشائمة وخوف حذر من ان الوضع سيكون أسوا مما كان لكن في الحقيقة لا يوجد داعي لتلك الهواجس المحيرة لأننا اذا نظرنا لما حدث في مصر في الشهور العشرة الاخيرة لا يمكن ان ينكر أحد انه معجزة بكل المقاييس ولقد كان مبهرا للكثيرين من المتابعين في العالم من حولنا وصادما وغير مصدق من الحاقدين في الداخل والخارج فان يتحرك شعب باكمله وينزل للشارع ليثور بعد ان ظن الجميع انه لا امل في المصريين وانهم استكانوا وخنعوا وخضعوا ولكن العبقرية المصرية دائماً تتجلي في كل الأوقات حتي ثورة المصريين اختلفت و كانت ثورة متفردة بنكهة مصرية خالصة لا اعتقد ان شعبا ما ثار او سيثور وبينكت وسط هذا المشهد المهيب والشهداء يتساقطون تلك عبقرية فريدة خاصة بالمصريين انهم اخف شعوب العالم ظلا لا شك لكنها خفة دم ممزوجة بالعبقرية اذا تأملنا الشعارات الكوميدية التي رفعت في ميادين التحرير في كافة ربوع مصر كلها تنم عن عبقرية اختزال موقف وإرادة شعب في جملة دعابية .. نعم لقد نجحت بدايات الثورة وربما ستاتي الايام القادمة او علي ما يبدو انها بالفعل أتت بالاسلاميين في صدارة المشهد السياسي ولن نخوض في ما سيفعلون قبل ان نري لكن ما هو حتمي وأكيد ولا جدال في ان المصري لا يمكن يضحك عليه ممكن يقراها بمزاجه بس بيرقد والأجمل والأعظم انه كسر حاجز الخوف اللي كان مسيطر عليه من ايام الفراعنة و علشان كل ده بكرة أكيد احلي

نسيم التحدي

اتذكر في مثل هذا الوقت من السنة في بدايات الربيع كانت امتحانات اخر السنة بتكون قربت قبل نظام الترم والكلام ده وطبعا كان الواحد عادة كان بيكون مزنوق وكان الجو ده بيمثل ليشخصيا نوع من التحدي وكنت دايما اشم رائحة النسيم وكنت اطلق عليه نسيم التحدي لأنه كان بيتزامن مع التحديات المطلوبة علشان نلحق نخلص البلاوي المتلتلة المتسابة طول السنة وكان للنسيم ده مفعول السحر معايا ودايما كان بيحفزني لسبب لا اعرفه يمكن علشان المصريين عموما وأنا علي وجه الخصوص منعرفش نشتغل غير تحت ضغط ووقتها بنطلع احسن ما فينا والدليل معظم البطولات اللي كسبناها في الكورة كان لازم نتزنق في تصفيات ونخش في حسابات وهنا كانت ولازالت بتتجلي الشخصية المصرية وقت الزنقة وفضل نسيم التحدي ده بيحفزني حتي بعد ايام الدراسة دائما كنت ولا زلت في هذا الوقت من السنة اكون في قمة التفاؤل والاحساس اني ممكن اكسر الدنيا المهم ان اليومين دول وبالصدفة بيتزامنوا مع نسيم التحدي بتاعي لحسن الحظ وفي ظل الظروف اللي مصرنا الجميلة بتمر بيها احنا محتاجين قوي لهذا الاحساس بالتحدي والحافز اللي يخلينا نتخطي كل ما يحيط بنا من صعاب انا عارف ان الموقف معقد جداوالتحديات مهولة والمخاطر محيطة بس كل ده ممكن التغلب عليه لو اتخلصنا من أشد افة لازالت كامنة في الشخصية المصرية وهي النفس القصير وده يفسر تفوق حسن شحاتة في البطولات المجمعة لكن خيبته راكبة جمل في معظم التصفيات التي خاضها المنتخب معلش انا بارجع للكورة كل شوية لانه المثل الحاضر في ذهننا كلنا تقريبا الموضوع عاوز مننا شوية نفس وقدرة علي التحمل انا بابقي حاتجنن لما باسمع ناس بعد الثورة الرائعة العظيمة التي تعد كما وقوة اكبر الثورات في التاريخ الحديث وشويةناس تقولك كفاية بقي احنا تعبنا هي العيال دي مش حتبطل بقي وتتلم والاغرب ان معظم وان لم يكن كل من يقول هذا لم يشارك اصلا ولا هو ولا حد تبعه او ابنه او قريبه استشهد او اصيب في خضم احداث الثورة العظيمة طيب يا عم الحاج هو احنا كنا خارجين نزهة فنزهق ونقرر اننا نروح البيت ونغير ونقعد نأنتخ قدام التليفزيون الموضوع اهم من كده بكتير واكبر يا ناس يا اللي مش فاهمين ولا مؤاخذة لازم نكمل للاخر مش علشان احنا ثورجية او علشان العيال دي فاضية ومش لاقية حاجة تعملها فبيطلعوا مظاهرات لأ لأن لو مكملناش حيطلع تيييييييت امكم سواء من تيار اسلامي غير معتدل ممكن ان يقفز للحكم وساعتها حيطلعها عليكم بط بط او نخترع مبارك جديد مع اختلاف الاسم فقط ونجيب طقم جديد يخوزئنا كام سنة جايين يا جماعة لازم نفسكم يكون طويل شوية ووحياة ابوكوا كلكوا اطلعوا البلكونة وشموا شوية نسييييييييييييييم تحدي يمكن تتعدوا جاتكوا والا بلاش