Friday, December 23, 2005

..................أحلام الشتا

الساعة دلوقت واحدة ونص صباحا والشتا بره عمال يديها صوت الشتا حاجة جنان سيمفونية والله نفسي أنزل دلوقت اتمشي وأشربلي سيجارة في الشتا بس لأني راجع تعبان من الشغل حأكتفي بسيجارة في البلكونة تحت المطر برضه أفتكر زمان من ييجي اربعتشار سنة كان حلم عندي أني امشي مع حبيبتي تحت المطر والحمد لله أتحقق حلمي وكمان ماكانش يحلالي القعدة علي البحر الا والشتا نازل والله منظر بمليون جنيه ولا أجدع فيلم رومانسي أمريكي (وده مش تحيز للسينما الامريكية لكن اعترافا فقط بتقدمها علي الاقل امكاناتا ) برجوعي أكثر بالذاكرة من أكتر من عشرين سنة أفتكر وأنا في ابتدائي كنت بارجع من المدرسة لما الدنيا تشتي مشي وطبعا كنت بأبقي غرقان والمصير معروف بس كله يهون علشان حبيبي ........... زمان كنت باحس ان الشتا بينزل بيغسل كل حاجة ويخليها جديدة الشوارع العربيات البيوت بلكونتنا حتي الهوا بيغسله
دلوقت لما الشتا ينزل بأحلم حلم واحد انه يغسل بلدنا بس مش من بره ولو انها محتاجة الغسيل من بره انما باطلب منه يغسل ضمايرنا ويخلينا نخاف علي البلد دي أكتر يغسل قلوبنا ويخلينا نحب البلد دي اكتر يغسل عقولنا ويخلينا نفكر في البلد دي اكتر
يا رب أنت دايما كنت بتحققلي أمنياتي مع الشتا يا تري حتحقق لي دي كمان والا انا باطلب حلم نحن لا نستحقه؟!...لتكن رحمتك

11 comments:

Dalia Fouad said...

مع انى ماليش خبرة مسبقة فى السجاير لكن أعتقد انها هتطفى لو مشيت بيها تحت المطر
بس انت عارف لو المطر غسل اللى جوانا فعلا هيحتاج معاه لمسحوق البلد بحالها لأننا اتغيرنا أوى وبقت طبائع الناس قاسية والظلم بقت ريحته تخنق
فعلا .. لتكن رحمتك

Rose said...

واضح ان اهم صفة في المدونين انهم يكونوا بيحبوا الشتا.. هي ايه الحكاية انا كنت فاكرة نفسي الوحيدة اللي بتحب الشتا والوحيدة اللي حلمت تمشي مع اللي بتحبه تحت المطر.. عموما الحمد لله ان ربنا حقق حلمك، واتمنى ان ربنا يستجيب امنيتك الحلوة قوي دي

Sarwa said...

بكرهه
الشتا
بس بحب المطر

Ahmed Shokeir said...

إنت إيه اللي مصحيك للساعة واحدة ونص الصبح فى البرد ده ؟

shortcut said...

دايما المشي تحت المطر بيفكرني بالمدرسة لما كنا بنلعب تحت الشتا و فرحانة بيه و مبللولة و اجرييييييييييييييييييي تحت منه
لو كل الناس حست بكده حيرجع قلبهم زي قلب الاطفال
و لتكن رحمتك

عشقك ندي said...

أستاذة داليا فعلا عندك حق المهم المسحوق ةالسيجارة مش حتتطفي بنقف تحت البلكونات
يا rose السبب ان الشتا نقاء
لازم تحبي كله علي بعضه باكدج يا ثروة
يا حاج أحمد الليل قلاب المواجع ويامااااااااا
يا ريت نرجع للطفولة يا shortcut

Lasto-adri *Blue* said...

أنا زى
sawra
مش بحب الشتا لكن بحب المطر

أكتر فصل بحبه هو الخريف... بحب لما أمشى والهوا يطير نى

ونفسى فى يوم أروح البحر ف عز الشتا... نفسى بجد يتحقق فى يوم أملى

وربنا يحقق لك أمنياتك الجميلة

سلاماتى

ابن مصر said...

المطر في اسنكدرية له طعم سحري بالذات مع كوباية شاي سخنة والمطر يخبط علي قزاز البلكونة وتبص علي السما تلاقيها محمرة شوية صوت المطر نفسه كان يجيب لي هدوء نفسي وبعد المطر سبحان الله الشمس تطلع والعصافير تزقزق ويروح المطر وتفضل اسكندرية مشتاقه له تاني

عشقك ندي said...

الله عليك يا ابن مصر اسكندراني بصحيح

HERA said...

ربنا يسمع منك
وفعلا احنا مانستحقش
إن الله لا يغير ما بقوم حتى يغيروا"" مابأنفسهم""
بس سيبك انت حلوه الحته بتاعت حبيبتك
والمطر دى

Eanass Abouzeid said...

الشتا دا حلم باستناه من السنة للسنة
ابرد مش مشكلة , بس برضه برد جمييييل, و قاهرية انا لكن عشقى لأسكندرية مالووش حدود , و حبى للمطر ميتوصفش. و نفسى مصر ترجع جميلة زى زمان , زى جمال الصور الأبيض و الاسود , بسيطة, هادئه , صافية من غير عوادم الناس و السيارات