Monday, December 19, 2005

اسكندرية الشتا الحب

أخيرا الشتا رجع بعد موسم صيف حر وطويل جداااااااااااااااااا لدرجة الملل واسكندرية بالذات بتبقي ممتعة ورائعة وأجمل مكان في ا لعالم في الشتا كأنها عروسة بتجهز لليلة فرحها وبتستحمي بمية الشتا فعلا هي عروسة البحر فعلا بس في الشتاء فقط أما الصيف فانها تكون مثل أكثر الغجريات غجرية مع الاعتذار للمصيفين بس هي فعلا بتخرج عن شعورها وجمالها ،وروعتها من شدة الزحام والصخب والقادمين ليس للتأمل في جمالها لكن لاستغلالها والتحرش بها..... الشتا في اسكندرية طعم تاني خالص هو صحيح اتأخر السنة دي كتير بس العشاق الحقيقين لاسكندرية كانوا مستنينه هو ساعات بيتقل بس بنبقي متأكدين انه جاي ببرقه ورعوده وامطاره ليملأقلوبنا بالأمل يعيد شحن بطاريات عواطفنا في الشتا أنا شخصيا بحس بحنين شديد للماضي الجميل والذكريات الحلوة والمؤلمة التي تركت اثار جروح علي قلوبنا والشتا هو الوحيد القادر علي اثارة هذه المشاعر عندي
ورغم اني ما باعترفش بأن الحب له وقت أو زمن بس مش عارف ليه حب الشتا طعم تاني يمكن علشان الدفء الذي يمنحه الحب في وقت احنا بنبقي محتاجينله
عموما اهلا بيك يا شتا مع حبيبتك اسكندرية وعشاقك ويا ريت تكون ناوي تقعد معانا شوية

7 comments:

shortcut said...

انا باعشق الشتا في اسكندرية و و قت المغربية علي الكورنيش و ارسم و احكي اجمل حواحيتك مع سحاب السما بالوان ما تتوصف و في اخر السنة امشي انا و اصحابي و نغني we wish a merry christmasو حاجات قديمة كتير بنحبها
اما الحب ففعلا بيبدا مع الشتا مش الصيف
merci

Geronimo said...

عايزة اروح اسكندرية في الشتا ومش بلاقي حد يشجعنى ... انا قاهرية
وبطلت اروح اسكندرية ف الصيف عشان منتهكهاش زي ما بتقول
فانحرمت منها وللاسف صيفا وشتاءا

عشقك ندي said...

اسكندرية مش محتاجة لمة في الشتا ممكن تستمتعي بيها لوحدك تاخدي يوم كده من أوله لاخره وتستمتعي بجمالها الحقيقي فعلا تجربة تستحق منك التفكير وكمان اسكندرية كريمة قوي مع الضيوف الخفاف

عشقك ندي said...

بنت مصرية كمان طلعت غاوية شتا

Doaa Samir said...

رحتها مرة واحدة وعشقتها، كنت في الصيف من كم سنة... بس السنة دي بقى هاموت وأروحها في الشتا، محتاجاها أوي.. تيجي أنا وإنتِ يا جيرونيمو؟!د

yara said...

اسكندرية حالة ..
والغريب ان الحب بشكل عام بين الناس بينشط فى الشتا والعلاقة بين الشتاوالحب خاصة جدا وماتتقالش

بنت مصرية said...

الحقيقة كل اللي انت كاتبه في كل المواضيع تحفة و عامل مزيكا فظيعة مع دماغيوانا داخلة الموقع صدفة بس آراءك عجبتني اوي