لسه السنجة بتقع

بعد غياب دام سنتين بالتمام والكمال عن مصرنا الحبيبة عدت أخيرا بس المفاجأة اني لقيت كل حاجة زي ما سبتها مافيش حاجة اتغيرت اللهم الا سوء الحالة الاقتصادية وتدهور المستوي المعيشي لاغلب طبقات هذا الشعب المطحون والمقهور والناس ولا هنا كأن ما يحدث في موزمبيق كله بيشتكي كله مخنوق محدش عاجبه حاله بس في الاخر كله بيتفرج والغريب ان هناك اشياء تتفجر فيها طاقات هذا الشعب زي مباراة مصر والجزائر النهارده والجميع يغني نغمة واحدة وكلنا مجتمعين وكأن مصير هذا البلد مربوط بتلك المباراة أنا طبعا باتمني من قلبي نكسب النهارده بالتلاتة ونوصل لكاس العالم بس السؤال اللي مجنني ايه الناس فين من اللي بيحصل فيها كل يوم امتي حنفوق ونحس اننا بنلعب مباراة مصيرية بس مش مباراة الجزائر مباراة مستقبل هذا البلد يا تري هل هناك أمل ان الشعب ده يفوق وياخد حياته بجدية ويعتبرها زي مباراة النهاردة اعتقد ان فيه احتمال كبير نكسب ماتش النهارده ونوصل كاس العالم بس ان الشعب ده يصحي ويفوق دي فيها كلام وربنا يتولانا جميعا