الحكومة تريد احداث فتنة

اثناء عودتي من الشغل النهاردةالساعة الواحدة بعد منتصف الليل قلت اعمل شوبنج عالماشي المهم اشتريت شوية حاجات وانا مروح لقيت الترام في وشي قلت اركبها لقيت الكمساري طلعتله ربع جنيه قاللي التذكرة بنص يا حضرة قلتله غريبة انا من قريب راكب بربع قاللي لا بعد الساعة اتناشر بالليل بقت بنص جنيه من اول الشهر دفعت ووقفت اراقب ردود فعل الناس واحدة ست قاعت تقولله دا انا لسه جاية بربع اروح بنص وواحد كان زعلان وقعد يبرطم ودخل في خناقة مع الكمساري والمفتش وقعد يقوللهم مش مهم انها غليت بس انا ما بحبش المفاجأت وغيره من ردود فعل الناس اللي شتم في البلد واللي قال نبقي ندي بعض التذاكر واحنا نازلين زي القطر وحاجات كتير
اللي انا مستغربه ليه الحكومة بتتعامل مع الشعب علي انه مغفل او ناقص اهلية ليه ميتعلقش لافتة فيها ان سعر التذكرة بنصف جنيه بعد الثانية عشرة مساء مع اني مستغرب السبب اشمعني ايه حفلة الميدنايت واللا علشان اللي سهرانين وحيركبوا بالليل اكيد ناس ريتش راجعين من الديسكو فمجتش عالنص جنيه المسالة انهم كييفة جس نبض زي ما قلت قبل كده زي معسكرات الاعداء يشوفوا رد الفعل وبعد كده الغلو يبقي صبح وليل حكومة غريبة
المهم يقولوا لك مش مهم الربع جنيه ما هو حيأثر علي باقي المواصلات المشروع حيغلي ويضاعف الاجرة والتاكسي يزيد جشعه والناس والله مش مستحملة انا كان نفسي اللي طلع القرار ده يشوف رد فعل الناس واحاديثهم اكيد لو متأزمش ورجع في قراره يبقي مريض نفسي يعاني من السادية الناس مكوية ليل ونهار والكارثة مش اقتصادية بس والله الناس ابتدت تضرب او ضربت خلاص واللي قلب علي دروشة واللي علي انحراف سلوكي وعدائية وكراهية لمن حوله الكارثة قادمة لا محالة فلتكن رحمتك يا رب بهذا الشعب المسكين